![almak](https://strumicanet.com/wp-content/uploads/2024/11/srnet-banner-noe-2-optimized.png")
На 6, 7 и 8 јуни во Струмица и Колешино ќе се одржува 23-то издание на Меѓународната литературна манифестација „Средби под јаворите – Видое Подгорец“, која годинава се совпаѓа со 90-годишнината од раѓањето на еден од најплодните македонски писатели, патописец, поет, раскажувач и романописец за деца и возрасни, Видое Подгорец, струмичанец роден на 8 јуни 1934 година во селото Колешино.
Манифестацијата започнува во четврток во 12:00 часот со свеченото доделување на признанието – Библиотекар на годината „Павлина Цунева Маказлиева“, а веднаш потоа во Домот на АРМ во струмица ќе се одржи советување на тема: „Библиотеката темел на писменоста“ на кое ќе говорат: проф. д-р Мариета Петрова, проф. д-р Анита Штерјоска Митреска, проф. д-р Милена Ристова Михајловска, Маја Мицевска Ризова, Марина Плашевска и м-р Елена Станкоска.
Официјалното отворање на манифестацијата е во петок, 7 јуни во 12:00 часот во големата сала на Дом на АРМ со перформанс на тема: „90 години од раѓањето на Видое Подгорец“.
На 8 јуни (сабота) во 12:00 часот во ООУ „Видое Подгорец“ во Колешино свечено ќе бидат доделени наградите по повод распишаните конкурси за деца и наставници во рамките на манифестацијата „Средби под јаворите – Видое Подгорец 2024“, по што ќе следува посета на куќата на Подгорец во Колешино и заедничко дружење.
