![almak](https://strumicanet.com/wp-content/uploads/2025/07/1080x206-srnet-optimized.png")
„Во Струмица има 18 згрижувачки семејства од вкупно 360-те во Македонија во кои живеат 608 деца без родители или без родителска грижа“ – кажа министерката за труд и социјална политика, Јована Тренчевска на денешниот Хепенинг во малиот градски парк во Струмица „Семеен ден за згрижувачките семејства“, а по повод националниот Ден на згрижувачките семејства и светскиот Ден на детето.
„Правилниот избор на формата на заштита на децата без родители и родителска грижа ќе им овозможи на децата креирање на безбедна семејна средина и планирана иднина, но и развивање на личности кои ќе треба да ја понесат одговорноста како возрасни лица подготвени за иднината. Децата во згрижувачки семејства добиваат дом, чувство на нормалност и идентитет како дел од семејна единица“ – кажа Тренчевска.
Градоначалникот на Струмица Костадин Костадинов е среќен што токму денешниот ден на детето и на згрижувачките семејства СОС Детско село – Македонија го одбележува во Струмица.
„Семејството е симбол на сплотеност, љубов, топлина, заштита и меѓусебна грижа. Сепак, постојат деца кои, од различни причини и без сопствена вина, биле оневозможени да ги почувствувааат тие убави белези на семејството. За среќа се уште постои човечноста и љубовта. На минатогодишниот настан ветив дека ќе обезбедиме средства за годишен одмор за згрижувачките семејства од Струмица. За жал, поради бирократски пречки се уште немаме добиено податоци за тие семејства, но јас се уште стојам на моето ветување, затоа што згрижувачките семејства тоа го заслужуваат“ – кажа во своето обраќање Костадинов.
Националната директорка на СОС Детско село, Јулијана Гапо најави дека СОС Детско село сака да отвори дисперзирана канцеларија во Струмица за поддршка на згрижувачите, а за тоа денеска ќе разговараа со градоначалникот Костадин Костадинов.
На денешниот Хепенинг во Струмица деца цртаа, бојадисуваа ракотворби, свој музички настап имаш и малиот Алихан, а настапија и најмалите танчери од „One Way Dance studio“ од Струмица.
