Струмица денеска беше домаќин на Државното првенство во кошарка 3х3 – Баскет за средни училишта во машка и женска конкуренција, во организација на Федерацијата на училишен спорт на Македонија и Сојузот на училишен спорт – Струмица, а се одржа во спортската сала на СОУ „Никола Карев“.
Во машка конкуренција победник е екипата на СУГС „Никола Карев“ од Скопје, второто место го освои екипата на СОУ „Јане Сандански“ од Струмица, трето место СОУ „Јосип Броз Тито“ од Битола, а четврта беше екипата на СОУ „Јосиф Јосифовски“ од Гевгелија.
Меѓу девојките најдобра екипа е, односно победник СОУ „Ѓорче Петров“ од Крива Паланка, втора екипата на СОУ „Славчо Стојменски“ од Штип и третото место го освои екипата на СОУ „Јосип Броз Тито“ од Скопје.
Првенството за отворено го прогласи заменик градоначалничката на општина Струмица, Елена Магеровска Паликарова која истакна дека оваа пролет, во релативно кус временски период, Струмица беше домаќин на неколку државни првенства за основни и средни училишта во разни спортови, а еве, тоа се случува и денеска.
„Убедена сум дека, како и досега, Струмица и овојпат ќе се покаже како беспрекорен град домаќин“ – кажа Магеровска Паликарова отворајќи го првенството во кошарка.
На оваа Државно првенство учествуваа победничките екипи на трите региони и екипата на градот домаќин Струмица.
