Пред големиот споменик на Гоце Делчев во Струмица денеска се одржа чествување на големиот двоен празник Илинден: 122-та годишнина од Илинденското востание и 81-та годишнина од Првото заседание на АСНОМ.
За историографијата и значењето на двата Илиндена говореше претседателот на Советот на општина Струмица, Марјан Даскаловски, потсетувајќи дека Илинден 1903 и Илинден 1944 година се двете големи нешта кои го сочинуваат нашиот вековен светоглед, кој не прави исклучително горди, и таа гордост ја чуваме, негуваме и унапредуваме, пренесувајќи ја на помладите генерации како непроценливо наследство добиено од нашите предци, од нашите татковци, дедовци и прадедовци.
„Факт е дека двата Илиндена се случиле во два сосема различни периода од македонската историја, но нема никакво сомнение дека нивниот коренов систем е сосема идентичен. Впрочем, слободата на татковината и нишаните на нејзината државност, се нешта кои се испреплетуваат и надополнуваат. Илинден не смее да биде само дел од едно наше минато свршено време, туку да биде наш потсетник за испишување нова страница од нашето битисување, нова успешна приказна во која свое место ќе пронајдат и идните наши поколенија“ – кажа претседателот Даскаловски.
Стихови за Илинден кажуваа членови на рецитаторската секција при Домот за деца и млади „Благој Мучето“ од Струмица, а свежо цвеќе пред споменикот на великанот Гоце Делчев положија претставници на Општина Струмица, на Сојузот на борците, здруженија, претставници на политичките партии СДСМ, ВМРО-ДПМНЕ и ЗНАМ.
