Во Регионалниот Центар за управување со кризи донирано теренско возило со ИКТ опрема за ноќни операции

Во дворот на Регионалниот Центар за управување со кризи во Струмица денеска се изврши примопредавање на возило „FORD KUGA ST X LINE“ со ИКТ опрема за ноќни операции, добиено од реализација на Проектот за ефикасно откривање и управување со шумски пожари со цел зголемување на подготвеноста и размена на практики со Грција – eFIDAR.

Возилото преку GPS е планирано да биде поврзано со дроновите и Командниот центар во Струмица заради ефикасно и рано откривање на шумски пожари, со зголемена прецизност, намалување ниски стапки на лажни аларми и способност за 24/7 работа што ќе го покаже потенцијалот на ваквата иновативна технологија, која ќе придонесе за рано предупредување за ризик од катастрофи од шумски пожари.

На примопредавањето на возилото присуствуваа директорот на ЦУК, Стојанче Ангелов и неговиот заменик Екрем Зендели, директорот на Центарот за развој на Југоисточниот плански регион, Ѓоко Камчев и координаторот на проектот Жулиета Ѓуркова, како и вработените во РЦУК Струмица.