Во Радово отворен нов предучилиштен Едукативен центар – амбасадорката на САД, Агелер ги посети децата во центарот

Членовите на локалната заедница, компании од приватниот сектор, локални граѓански организации и Агенцијата на САД за меѓународен развој (УСАИД) преку Програмата за развој на заедницата ги здружија своите сили во поставување и опремување на нов предучилиштен Едукативен центар „Огражденски пеперутки“, кој се наоѓа во селото Радово, општина Босилово. Едукативниот центар има капацитет за околу 20 деца со можности за негово проширување во иднина.

Денеска во Радово, амбасадорката на САД во Македонија, Анџела Агелер и ВД директорот на Канцеларијата на УСАИД за економски развој, Кристофер Доџ ги посетија децата во Едукативниот центар и разговараа со градоначалникот на општина Босилово, Ристо Манчев и жителите за предизвиците со кои тие се соочуваат и како истите може да се надминат.

Амбасадорката Агелер ја истакна важноста на соработката помеѓу локалните актери за решавање на локалните приоритети и стимулирање на економскиот развој во руралните средини.

За градоначалникот на општина Босилово, Ристо Манчев Едукативниот центар во Радово претставува одлична можност за едукација и социјализација на децата од предучилишна возраст и е прв таков центар во руралните општини во Македонија, со надеж дека во иднина заеднички во соработка со УСАИД и Амбасадата на САД ќе се реализираат уште многу други проекти во општината Босилово.

Дваесеттина деца од регионот се запишаа во Едукативниот центар каде секојдневно имаат пристап до предучилишно образование, дружење и игра со своите врсници што влијае на зголемување на квалитетот и опфатот на образованието во руралните заедници. Со тоа, мајките на овие деца сега можат поактивно да пристапат кон пазарот на трудот и да се вклучат во локалната работна сила. Се очекува овој предучилиштен едукативен центар да има позитивно влијание врз намалување на миграцијата поради тоа што семејствата ќе можат да ги најдат потребните образовни и згрижувачки услуги во својата заедница, наместо истите да ги бараат во поголемите, урбани центри.

Центарот „Огражденски пеперутки“ е поддржан од Програмата на УСАИД за развој на заедницата, имплементирана од Мрежата за рурален развој на Северна Македонија во соработка со ЛАГ Беласица-Огражден, која ја опфаќа територијата на општините Босилово, Василево, Ново Село и Струмица, како и останатите четири Локални акциски групи од регионот.