Во престижната софиска галерија [a]cube contemporary поставена изложбата „Реминисценции“ на Марјан Ѕингаров

Во Бугарија, во престижната софиска галерија [a]cube contemporary е поставена изложбата „Реминисценции“ на ликовниот уметник од Струмица, Марјан Ѕингаров.

Изложени се дела во голем формат, а поводот за поставување на дел од циклусот „Реминисценции“, кој Ѕин го обработува последните години е добиената втора награда на Четвртиот меѓународен конкурс за апстрактно сликарство мал формат ’21х21′ за 2022 година, на кој учество зедоа над 100 автори. Конкурсот беше анонимен, а наградите на најдобрите ги додели 5-члено жири. Вторатa му припадна на струмичанецот Марјан Ѕингаров.

Изложбата „Реминисценции“ е 12-ти авторски проект на уметникот Марјан Ѕингаров и вклучува платна во кои преовладува монохромна палета со акценти од кармин и тиркизно сино.

Изложбата „Реминисценции“ во оваа галерија во Софија ќе биде отворена до 8 јуни.

Марјан Ѕингаров е роден во Струмица во 1976 година, магистрирал на катедра Плакат и визуелна комуникација во 2005 година на Националната ликовна академија во Софија и повеќе од 20 години живее и твори во Бугарија. Покрај самостојните и групните изложби во Бугарија, Македонија и Романија, тој има учествувано и на десетици групни изложби во Грција, САД, Англија, Шпанија, Швајцарија, Италија и Чешка…