Во пресрет на локалните избори Општинскиот комитет на ВМРО-ДПМНЕ Струмица ја создава својата програма – најави Петар Јанков

Во пресрет на локалните избори Општинскиот комитет на ВМРО-ДПМНЕ Струмица ја создава својата програма, кажа на денешната прес конференција потпретседателот на ОК на ВМРО-ДПМНЕ во Струмица, Петар Јанков.

Интегрален текст од прес конференцијата:

Имам чест, како координатор на комисиите и стручните тела на комитетот активно да работам на програмските документи. Особено задоволство ни претставува соработката со нашите сограѓани од кои добиваме информации за проблемите, а посебно кога слушаме предлог решенија за локални и комунални проблеми.

Комисиите на Општинскиот комитет имаат задача да ги откријат сите конкретни проблеми и да го следат остварувањето на ветените програми.

Покрај 20-годишното задржување на СДСМ на локална власт во Струмица не се решени многу проблеми. Според кои, за жал, општината е прочуена.

Загаденоста на воздухот, проблемот со водата за пиење, дивоградбите, запуштена инфраструктура како и поплавите на „Младинска“, „Ленинова“, Куклиш и Дабиле. СДСМ не можеше да ги реши 20 години. За многу кратко време во јавноста ќе зборуваме не само за проблеми, туку и за конкретни предлог решенија.

Во ова обраќање би сакал да го свртам вниманието на струмичката јавност кон проблемот со водата за пиење.

Познато е дека минатата година имавме проблем со питкоста на водата од струмичкиот водовод. Прашањето е: Дали со доаѓањето на пролетта и летниот период струмичани ќе се најдат на предизвик да пијат вода која не е доволно здрава или квалитетна.

За таа цел ние го прифаќаме предлогот од наши сограѓани откако ВМРО-ДПМНЕ ќе ја  преземе локалната самоуправа да ја акредитира лабараторија на струмичкиот водовод. Граѓаните, во секој момент, да имат увид во квалитетот на водата што се пие.

Наскоро ќе дојдат изборите, веќе е извесно дека ВМРО-ДПМНЕ ќе победи и во Струмица. Одговорност, промени и решенија набрзо следуват.