Во петок во Струмица – Изложба на графики од Трајче Блажевски

Во петок, 18 октомври во 19:30 часот, во Центарот за култура „Антон Панов“ во Струмица ќе биде отворена изложбата на графики од Трајче Блажевски. Авторот ќе се претстави со триесеттина уметнички дела – графики изработени во периодот 2017-2024 година.

Уметникот Трајче Блажевски реализирал повеќе од 60 самостојни изложби во Македонија, Србија, Бугарија, Германија, Италија, Словенија, БиХ, Црна Гора, Полска и Романија. Учествувал во над 600 домашни и странски изложби. Добитник е 16 домашни и 5 странски награди во текот на неговата творечка кариера. Бил професор во Училиштето за применета уметност, технички уредник во дневниот весник „Нова Македонија“, поседувал статус на слободен уметник, предавал во Трговско-училишниот центар, работел во Културно-информативниот центар во Скопје и бил редовен професор на Факултетот за ликовни уметности при Универзитетот „Св. Кирил и Методиј“ во Скопје, од каде заминува во пензија.

Изложбата на графики на уметникот Трајче Блажевски се организира од НУ Центар за култура „Антон Панов“ Струмица, а е финансиски поддржана од Годишниот конкурс за поддршка на проекти од национален интерес за 2024 година на Министерството за култура и туризам.