![almak](https://strumicanet.com/wp-content/uploads/2025/07/1080x206-srnet-optimized.png")
Неколку готвачи од Струмица и Скопје за денеска напладне подготвија 2500 килограми бел грав, односно 3000 порции, по струмички бел фасуљ, како дел од традиционалното одбележување на Чист понеделник во рамките на програмата на годинашното издание на Струмичкиот карневал.
Годинава гравот се готвеше на отворено во огромниот казан, а беше поделен на плоштадот „Гоце Делчев“ во убаво спакувани порции, со кои секој граѓанин можеше да се послужи и да си понесе за дома или за на работа.
Белиот грав го благослови отец Стоил Димитриев од Струмичката Православна Епархија во присуство на голем број граѓани, градоначалникот на Струмица, Костадин Костадинов, членови на Советот на општината, карневалскиот одбор. Градоначалникот Костадинов не го вкуси гравот, но со претседателот на Советот, Марјан Даскаловски „го забркаа“ малку во големиот казан.
Даскаловски и го проба, вели дека бил премногу вкусен, готвачите одлично си ја завршиле работата. Посака уште една порција, ама не му се чекаше повторно во редот од многуте граѓани кои чекаа за да го пробат струмичкиот фасуљ.
Во подготовката на гравчето се вклучија неколку готвачи од Струмица и Скопје, Димитар Младенов, Мите Петров, Никола Мишковски, Кирил Иванов, Игор Каспер Атанасов, Горан Филипов, Жика Делевски, Зоран Андонов, Миле Неделковски, Благоја Велковски.
Овој настан беше во организација на Здружението за афирмација на млади угостители „Ескофиер“, а во соработка со Општина Струмица, ЈПКД „Комуналец“ Струмица, СОУУД „Димитар Влахов“ Струмица, рестораните „Ројал Парк“, „Летница Ланч“, „Концепт“, „Еснаф“, „Стара Куќа“, „Кепаса Ланч Бар“, „Батлерс“, „Бонџорно“, „Дукат“, „Бонита“, „Мамас“, АД ИГМ „Еленица“, „Кај Баче“, Цвеќара „Весна“, „Гама Десинг“, „Маби Трејд“ „Дентина“, „Универзал градба“, „Ми-Сто“, „Алутек-Хартек“, „Барик ХМ“, „Грозд“ Струмица, „Форвард Китто“, Печатница „Дело“, „Јанев Компани“.
Денеска, утре и среда, се деновите познати како Тримери, кога верниците подготвуваат само посна храна. Всушност, од денеска започнува Велигденскиот пост.
