Во Младинскиот центар промовирана сликовницата „Тино – бездомното полжавче“ од Сузана Мицева

Младинскиот центар во зградата на Општина Струмица полн со дечиња. Осумдесеттина деца од Струмица и Штип ја слушаа приказната од сликовницата „Тино – бездомното полжавче“.

Сликовницата раскажува за авантуристичкото полжавче Тино, кое станува бездомник кога при едно искачување по планинските ридови за да собира приказни од старите орли, врз неговата куќичка ќе падне голем орев и таа ќе напукне. Низ процесот на тагување и закрепнување, полжавчето ќе се насели во една печурка и со неа ќе ги открие радоста на другарувањето, на грижата, на дарувањето, но и на значењето на зборот дом – место каде што сме свои, слободни и сакани.

Ученици од трето одделение при ООУ „Ванчо Прке“ од Штип под менторство на наставничката Милена Авукатова, на промоцијата со драматизација на текстот од сликовницата не воведоа во приказната на авторката Сузана Мицева и илустраторката Сара Каурин. Третоодделенци и петтодделенци од ООУ „Видое Подгорец“ од Струмица, под менторство на наставничките Тена Зафирова и Соња Цицимова, преку книжевна креативна работилница со своите идеи додадоа продолжение на приказната за Тино. Децата твореа и разговараа за пријателството, љубовта, поддршката и важноста на домот и семејството.

Промотор на сликовницата беше д-р Ана Витанова-Рингачева, а на промоцијата се обрати и истакнатиот фолклорист, Иван Котев кој зборуваше за важноста на бајките и приказните за растењето и едуцирањето на децата.

Сликовницата освен со илустрации на академската сликарка Каурин, збогатена е и со илустрации – боенка, за да можат дечињата сами да ги доловат авантурите и расположенијата на полжавчето Тино.

Оваа е четврта промоција на сликовницата „Тино – бездомното полжавче“, прва во Струмица.

ФОТОГАЛЕРИЈА