Во март минималната плата ќе биде над 20.000 денари – најави министерката Јована Тренчевска

Министерката за труд и социјална политика, Јована Тренчевска најави дека со новата методологија за усогласување на минималната плата таа во март ќе изнесува над 20.000 денари.

„Методологијата за пресметка на минимална плата, донесена во март 2022 година, е системско решение кое предвидува постојан раст на минималната плата. Решение кое нема да зависи од политичка волја, туку се усогласува со порастот на трошоците за живот и порастот на просечната плата. Во март секоја година, согласно оваа методологија ќе се усогласува минималната плата“, кажа министерката за труд и социјална политика Јована Тренчевска.

Таа истакна дека во рамки на Економско социјалниот совет, во март ќе се разговара за минималната плата согласно податоците добиени од ДЗС.

„Очекуваме минималната плата да биде околу 20.200 денари. Тоа е околу 12-13% или за околу 2.000 денари повисока плата од 2022 година. А ако земаме наназад, кога минималната плата беше 9.000 денари, и тоа не во сите сектори, некои сектори исплаќаа и по 8.000 денари, сега во март ќе имаме плата над 20.000 денари, што е и повеќе од двојно. За 12.000  денари повисока минимална плата“, посочи Тренчевска.