Во Клонот 3 на Детската градинка „Детска радост“ отворено инклузивно игралиште

Денеска во дворот на Детската градинка „Детска радост“, спроти главната болница во Струмица со поддршкаа на Кинеската амбасада е отворено инклузивно игралиште.

На отворањето присуствуваа градоначалникот Костадин Костадинов, министерката за труд и социјална политика Јована Тренчевска и директорката на Државниот санитарен и здравствен инспекторат Рената Младеновска, кои на децата што престојуваат во ова градинка им поделија играчки.

„Нема поубав почеток на денот од средба со најмладите сограѓани – децата, а уште повеќе кога се радуваме на заедничките успеси на локалната и централната власт. Плод на успешната соработка со Министерството за труд и социјална политика е и новата градинка „Виножито“, најголема во државата и прва во Струмица по 40 години, а за чија инфраструктура општината вложи 20 милиони денари“ – вели градоначалникот Костадин Костадинов.

Министерката Тренчевска вели дека како министерство се залагаат секое дете да добива соодветна грижа и услови за соодветен раст и развој, затоа се градат се повеќе градинки, се зголемуваат капацитетите со цел секое дете да има можност да биде дел од предучилишното воспитание и образование. Таа посочи дека особено е запазена социјалната компонента во градинките и можноста на секое дете да биде вклучено во детската игра.

„Ме радува тоа што со овозможувањето на вакви игралишта придонесуваме кон тоа раскажувањето на децата за нивните денови во градинката да не бидат проследени со негативни чувства на неприфаќање, туку среќни детски спомени“ – истакна Тренчевска.

Градоначалникот Костадинов најави дека во интерес на децата и нивните родители го продолжуваат Јавниот повик за ослободувањето од плаќање на надомест за престој на деца на самохраните родители во градинките „Детска радост“ и „Виножито“ кои земаат плата пониска од просечната месечна плата во државата и невработени лица, а последен рок беше денеска, се со цел што поголем број деца да бидат опфатени со оваа мерка.