Во Католичката црква „Раѓање на Свети Иван Крстител“ во Струмица се одржа свечена академија по повод 10 години од основање на парохијата

Синоќа во парохиската сала „Мајка Тереза“ при парохијата „Раѓање на Свети Иван Крстител“ во Струмица се одржа свечена академија по повод јубилејот 10 години од основање на парохијата. На академијата присуствуваше Н.В.П. монс. д-р Киро Стојанов, Скопски бискуп и Струмичко – скопски епарх, свештеници од Струмичко – скопската епархија, сестри Евхаристинки, верници од парохијата, како и пријатели и поддржувачи.

Свеченоста започна со тропар за Раѓањето на Свети Иван Крстител, а свое обраќање имаше протојереј отец Гоце Костов, кој направи краток осврт за развојот на парохијата изразувајќи благодарност на сите оние кои ја поддржуваа парохијата во изминатите години. Беше прикажан краток видео запис за парохијата и промовирана парохиската интернетска страница.

Во своето обраќање епископот Стојанов истакна дека секој јубилеј е можност да се осврнеме на изминатиот период, да погледнеме на радосните и убави моменти, но и на проблемите и предизвиците со кои сме се соочувале и откако сме ги поминале и надминале во нив можеме да ја препознаеме Божјата присутност и поддршка.

„Во оваа прилика сакам да го искажам своето задоволство што оваа зграда, која до основањето на парохијата беше материјална градба, оживеа со присутноста Христова во Светата Евхаристија од каде голем број луѓе црпат сила за својот христијански живот. Па така оваа Црква, сега е и жива заедница, што е и примарна цел при градба на секоја црква“ – кажа монс. Киро Стојанов, потенцирајќи дека секој оној кој влегува во овој свет храм, веќе има дадено свој придонес, можеби е како едно мало камче во мозаикот, но токму со тоа мало нешто ја дава убавината на целата слика.

Епископот Стојанов спомна и дека веќе десет години од оваа парохија се уредува порталот Католици.мк, кој е глас на Црква, редовно пренесувајќи ги настаните и случувањата од Црквата во Македонија и светот, но и можноста говорите на Светиот Отец, посебно неделните обраќање за време на молитвата Ангел Господов и Генералните аудиенции да ги имаме на македонски јазик.

Свеченоста заврши со благослов од епископот Стојанов, разгледување на поставената фото изложба – 10 години парохија „Раѓање на Свети Иван Крстител“ Струмица.

И денеска од 10:30 часот, со света архиерејска Литургија, која ќе ја предводи Н.В.П. монс. д-р Киро Стојанов, Скопски бискуп и Струмичко – скопски епарх, парохијата „Раѓање на Свети Иван Крстител“ Струмица ќе го одбележи јубилејот 10 години од основањето на парохијата.

Со декрет на епископот Стојанов од 1 септември 2013 година е основана парохијата „Раѓање на Свети Иван Крстител“ во Струмица, додека на 1 ноември 2013 година, по задоволувањето на литургиските потреби, а со благослов на Н.В.П. монс. д-р Киро Стојанов во парохиската црква е служена првата света Литургија.