![almak](https://strumicanet.com/wp-content/uploads/2024/11/srnet-banner-noe-2-optimized.png")
Во пресрет на патрониот празник на селото Иловица Св. Атанасиј, викендот се одржа 6-от Фолклорен Фестивал „Св. Атанасиј 2023“ во организација на Културно-уметничкото друштво „Кирил и Методиј“ од Иловица, кое годинава ја одбележува 10-годишнината од основањето.
Синоќа на Фолклорниот фестивал се претставија четирите групи на КУД „Кирил и Методиј“ од Иловица, Ансамблот „Етнос“ од Скопје, КУД „Јахи Хасани“ од Чеграни, гостиварско, КУД „Стоби“ од Градско, КУД „Русалии“ од Секирник и НЧ „Антон Попов“ од Самоилово, Бугарија.
Публиката во преполнетата спортска сала уживаше во изведбите на Кумановка, Невестински свадбени обичаи, Полошко оро, Егејски игри, Тресеница, Жетварка, Русалиски игри, но и други кореографии во изведба на учесниците на годинашното издание на Фолклорниот фестивал во Иловица.
Претходно, во саботата се одржа Вечер на изворни инструменти на која настапија ученици на ООМУ „Боро Џони“ од Струмица под менторство на професорот Игор Ангелов, Никола Ѓоргиев од Дрвош, како и Фолклорниот ансамбл „Велигденски цветови“ од Јаргулица.
„Македонската песна и македонското оро извира од душата и срцето на секој Македонец, и токму овие настани ни овозможуваат да се потсетиме на тие чуства и убавини. Традицијата, културата и обичаите, тоа е она што ни помага и ни дава сила да издржиме низ вековите и да опстоиме како народ“ – кажа во своето поздравно обраќање градоначалникот на општина Босилово, Ристо Манчев упатувајќи честитки по повод јубилејот на КУД „Кирил и Методиј“, како што кажа, гордоста на општина Босилово, а на сите учесници им упати благодарност што се дел од оваа манифестација.
Организаторите, КУД „Кирил и Методиј“, по повод 10 години од основањето на друштвото доделија плакети и благодарниците на сите кои помагаа во развојот на ова друштво, на своите соработници и учесниците на фестивалот.
