Денеска на ден пред големиот Христијански празник – Божиќ, кога во многу градови и села се организираат веќе традиционални Бадникарски поворки, во општина Босилово, односно во селата Босилово и Штука за прв пат се организира ваква поворка создадена од многу деца од овие населени места.
Здружено во поворка, радосно и достоинствено децата коледарчиња ја вознесуваа веста за Христовото Раѓање пеејќи ја песната „Вечниот Бог“. Сите деца учесници во поворката добија бадникарски пакетчиња.
Во Штука, коледарчињата собрале пари, 14.060 денари кои ќе ги донираат за лекување на 7-годишната Дениса Стоева од Штука која се наоѓа на Детската клиника во Скопје, а лекувањето треба да го продолжи во Турција. Девојчето боледува од редок вид на леукемија, а за донирање е отворена и сметка со број: 3000037120211363 во Комерцијална Банка.
