Во Белград е поставена изложба на познатиот академски сликар Стојан Пачов, родум од Струмица

Во Галеријата на Домот на Војската на Србија во Белград беше отворена ретроспективна изложба на познатиот академски сликар Стојан Пачов од Струмица, кој долги години живееше и работеше во Србија. Изложени се 55 слики и дела од повеќедеценискиот опус на уметникот.

Поставената изложба белграѓани и сите љубители на уметноста кои престојуваат или поминуваат таму ќе можат да ја видат до 22 јуни.

Стојан Пачов кој е роден 1934 година во Струмица, дипломирал на Академијата за ликовни уметности во Белград и во 1958 година завршил постдипломски студии во класата на професорот Недељко Гвозденовиќ. Оттогаш е активно присутен на ликовна сцена во Србија, а често ги изложувал своите дела и во Македонија. Повеќе пати учествувал на Струмичката ликовна колонија.

Добитник е на повеќе награди за сликарство и во текот на своето децениско творење има организирано голем број самостојни изложби. Учествувал и на тематски и хуманитарни аукции за кои добил благодарници и признанија. Се занимавал и со педагошка работа, предавајќи ликовно во основното училиште „Светозар Милетиќ“ во Земун, каде денес една од улиците го носи неговото име.

Преглед на целокупното творештво на Стојан Пачов, како и критики и рецензија од угледни ликовни критичари, може да се најдат во неодамна отпечатената Монографија која содржи 200 репродукции во боја, а која беше промовирана на самата изложба.

• Во Белград од 7 до 22 јуни ќе биде поставена ретроспективна изложба на дела од струмичанецот Стојан Пачов