Во акцијата на ЈПКД „Комуналец“ за чистење на дивите депонии само од депонијата во Муртино е собрано 320м³ отпад

Во акцијата на ЈПКД „Комуналец“ Струмица за чистење на дивите депонии која започна пред два дена се исчистени дивите депонии во Муртино и Банско. Со механизација и камиони само од депонијата во Муртино е подигнато 320 кубни метри отпад кој е депониран во депонијата „Шапкар“.

Од комуналното претпријатие информираат дека во текот на наредната недела се продолжува со чистење и на другите диви депонии низ сите населени места во општина Струмица.

„За да го осетиме бенифитот од ваквите акции покрај нашето редовно чистење, секако потребна е и соработка и помош од сите граѓани пред се со зголемување на еколошката култура и нефрлање на отпад покрај патиштата и во нивите. Отпадот од домаќинствата континуирано го подигаме од градот и сите населени места, а останатиот отпад од градот да се пријавува на тел 13-110. Останатиот отпад од населените места граѓаните се должни да го депонираат исклучиво во депонија „Шапкар“ или да го пријават на бројот 13-110“ – велат од ЈПКД „Комуналец“.