ВМРО-ДПМНЕ со Николоски, Милошоски и Марков од „четворката“ одржаа предизборен митинг во Ново Село

Во рамките на преизборната кампања за Претседателски и Парламентарни избори 2024, синоќа ВМРО-ДПМНЕ одржа митинг во Ново Село.

На митингот се обратија кандидатите за пратеници д-р Петар Марков, Антонијо Милошоски и носителот на листата за пратеници во Изборната единица 4, Александар Николоски.

Пред бројниот народ, жители на Ново Село, кандидатот за пратеник од оваа општина, д-р Петар Марков кажа:

„СДСМ ги втурна сопствените луѓе во многу тешка ситуација заради спас и богатење на десетина луѓе. Не испушти да отвори фронт кој им се укажа да го отворат. Ете да речеме дека е природно да постои остра реторика со ВМРО-ДПМНЕ или со било која политичка партија; но, со цела памет арогантното раководство на СДСМ влезе во отворена пресметка со Црквата. И сето тоа заради фактот што Црквата застана на браникот на семејствата и нашите деца од родовите политики на Јована Тренчевска кандидатка од СДСМ“, кажа Марков.

На митингот пред присутните се обратија пратеникот Антонијо Милошоски и носителот на кандидатската листа за пратеници, Александар Николоски.

„Во изминативе 24 часа поминати од одржаниот централен митинг во Охрид, ВМРО-ДПМНЕ не слушна демант од СДСМ за информацијата дека се спремни да им отстапат на ДУИ дури 70 проценти од позициите во државата се со цел некако да се задржат на власт. Спремни се заради криминалот да направат многу отстапки пред албанските партии“, кажа Александар Николоски.

Николоски потенцираше дека ВМРО-ДПМНЕ со оглед на бројноста на македонскиот народ во државата, како македонска партија дејствува разумно дека нема да се изгради здрава национална политика без поширок национален консензус за клучни прашања. И затоа презеде чекор за предлог до одредени партии за градење на национално единство. Со СДСМ таков консензус не е возможен, но предложено е до други партии од опозициониот блок. Но, ваквиот добар потег од ВМРО-ДПМНЕ иако е логички и добронамерен останува неразбран. Николовски заклучи дека е јасно дека политички субјекти во опозициониот кампус како Левица работат поврзано со актуелната власт на СДСМ и ДУИ со цел да одземат гласови од ВМРО-ДПМНЕ.

Говорејќи за противкандидатот од СДСМ, Венко Филипче, Николоски се осврна на скапата кампања која ја има СДСМ. Видео спот на СДСМ со возило чија цена е еквивалент на сума која не се заработува ниту со пратеничка ниту со министерска плата. Скапата кампања на СДСМ се одвива на сметка на народот.

Во врска со појавувањето на поранешниот претседател на СДСМ, Зоран Заев во ново видео, заради поддршка на СДСМ во кампањата, носителот Александар Николоски му порача:

„Зоране, ние на Локалните избори те прегазивме и после тоа те испративме во пензија, заврши твоето, доста е“ – кажа Николоски.