![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Синоќа пред влезот во големиот градски парк во Струмица, ВМРО-ДПМНЕ организираше предизборен Митинг на кој беше промовиран кандидатот за претседател на Македонија, Гордана Силјановска Давкова.
„Навистина е чудно како после пет години самотија таму на планината Водно некои луѓе не се запрашуваат дека одземјаќи ни го името, загрозувајќи ни го идентитетот, бришејќи ни ја историја со постојаната измена на преамбулите, како да сакаат да не вратат 100 години назад. Наместо да се срамат од тоа, тие уште се повикуваат на вас, дека да не бил народот нема да посегнале по тие храбри, европски одлуки“ – кажа Силјановска Давкова.
Таа кажа дека во некоја идна измена на Законот за локална самоуправа мандатот на градоначалниците треба да се ограничи на два, зошто има градови, како Кичево, каде што од 2001-та до денеска еден го владее градот.
„Кога посетувам некои градови низ Македонија, како Кичево, Струга, па и Струмица, имам сериозен проблем. Асоцијацијата ми е на некои феуди, на некои фамилии што поседуваат градови и се плашам дека тоа ми личи на нешто што денеска економистите и политиколозите го нарекуваат опасност од рефеудализација. Тоа значи дека не само власта, туку и богатството се концентрира во една многу мала група на луѓе од неколку семејства кои се однесуваат како феудалци“ – изјави синоќа во Струмица кандидатката за претседател на ВМРО-ДПМНЕ, Гордана Силјановска Давкова.
„За слободата гинеле многу луѓе, секоја педа од Македонија е платена скапо. Народот ја има можноста да испише нова, победничка историја“ – порача од Струмица претседателот на ВМРО-ДПМНЕ, Христијан Мицкоски. Според Мицкоски, никогаш не било полошо и системот се распаѓа. За тоа, вели, е одговорна актуелната власт која способните ги брка, а неспособните ги наградува. Тој порача дека Македонија нема повеќе време за чекање и сега е можноста народот да одлучи за подобра иднина на Македонија и државата да му се врати на народот, бидејќи СДСМ ја дала на тацна на Груби, Османи, Џафери и Ахмети.
