ВМРО-ДПМНЕ за посетата на премиерот Ковачевски на Струмица: Нема што да бара во Струмица, нема направено ништо за нашиот град

Струмичкото ВМРО-ДПМНЕ реагира на денешната посета на премиерот Димитар Ковачевски на Струмица. „Димитар Ковачевски нема што да бара во Струмица, затоа што нема направено ништо за нашиот град. СДСМ шест години се апсолутна власт без никаков бенефит за струмичани“, стои во писмената реакција на ОК на ВМРО-ДПМНЕ Струмица испратена до медиумите.
„Наместо да ги посетува и отвора проектите започнати и изградени во мандатот на претходниот градоначалник на Струмица, Димитар Ковачевски треба да застане со отчет пред струмичани за она што неговата Влада го има направено.
Да застане пред објектот на Општа Болница и да одговори кога ќе биде завршен, да застане пред објектот на Стариот театар и да каже кога ќе му стави барем влезна врата, кога гледаме дека не може да го пушти во употреба.
Да одговори кога ќе започна со изградба новиот ветен Експресен пат Смоквица – Струмица – Ново Село – граница со Република Бугарија како и ветениот железнички крак кон Република Бугарија.
Или барем да каже кога ќе биде започната ветената реконструкција на Спортската сала „Парк“, каде што вечерва ја одржува партиската трибина.
Да одговори колку странски инвестиции донесе во Струмица, до каде е изградбата на новата Агроберза, што станува со ветениот нов Музеј или отворањето на Културен центар во старата касарна.
Наместо тоа, премиерот Димитар Ковачевски дојде во Струмица за да ги покрива неуспешните проекти на Општинската организација на СДСМ во Струмица. На пример, надалеку прочуениот проект за гасификација, чудо на Балканот според огромните инвестиции од страна на струмичани и речиси никаквиот ефект за граѓаните.
Овие денови видовме дека градоначалникот Костадин Костадинов има време за партиски настани и сликање со своите партиски директори но, нема време да ги слушне граѓаните од трибините кои самиот ги закажува.
СДСМ Струмица со своето континуирано дејство во регионот од непрекинати 20 години го осиромаши и избрка нашиот работен народ и ја уништи и Струмица и Македонија“, напишаа од ОК на ВМРО-ДПМНЕ Струмица.