![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Во Струмица се одржа Третата Академија за здравство на ВМРО-ДПМНЕ на која учествуваа предавачи, професори на Медицинскиот факултет во Скопје, специјалисти со долгогодишно искуство во ЈЗУ Општа Болница во Струмица, здравствени работници од струмичкиот регион и пациентски здруженија.
Станува збор за научен собир на кој покрај тоа што се потенцираат проблемите во здравството ќе бидат истакнати и новитетите во здравството или она што го нуди современата медицина.
Модератор беше проф. д-р Борче Георгиевски, доајен и истакнат супспецијалист хематолог, а акцент се стави на областите патологија, онкологија, радиологија ендокринологија, гинекологија и медицинска етика.
„Главната идеја ни е да покажеме потреба од зајакнување на јавното здравство, потреба од зајакнување на здравствениот систем и потреба да ги задржиме стручњаците во земјата. Многу ни е драго што на овие Академии ни се приклучуваат и невладини организации и здруженија на пациенти со коишто дополнително ги споделуваме проблемите. Сметаме дека тоа е многу важно, за да покажеме една отвореност, една обединувачка компонента којашто е многу важна за да добиеме еден здравствен систем кој ќе биде функционален“, кажа доцент д-р Игор Николов од Клиниката за Нефрологија во Скопје, претседател на Комисијата за здравство при ВМРО-ДПМНЕ.
Д-р Никола Маџунков од Општинскиот комитет на ВМРО-ДПМНЕ Струмица, вели дека со овој настан ВМРО-ДПМНЕ го покажува значењето на проблемот со здравство во општина Струмица, во насока на решавање на сите проблеми.
„Целта на овие предавања е подобрување на здравствениот систем од кој директно зависи здравјето и животот на нашите сограѓаните. Како Општински комитет горди сме и ни претставува чест што бевме домаќини на ваков прекрасен научен настан“, кажа д-р Николов.
