ВИДЕО: „Божиќен ден“ песна со Тина Русева и Александар Петрески

Малото девојче од Струмица, која струмичани ја познаваа како вроден тален со прекрасен глас и нејзините изведби на настани што се организираа во Струмица, Тина Русева, сега девојка која живее во Германија со нејзиното семејство, предпразнично сними божиќна песна во дует со Александар Петрески, музичар од Охрид кој живее исто така во Германија.

„Божиќен ден“ е насловена песната за која музиката, текстот, аранжманот ги направи Александар Петрески. Инспирирана е од темата на книгата со трите зајачиња (Drei Häschen im Weihnachtsgewimmel – mit Tannenbaum unterm Sternenhimmel, Aspasija Topalovska Petreska).

„Дојдов до идеја да ја напишам оваа божиќна детска песна, во која e даден поглед на среќата која децата ја чувствуваат за божиќните празници или како што се вели, најубавото време во годината. Но дали секое дете исто ја чувствува таа среќа? „На овој прекрасен ден, делиме се, божиќен ден, носи среќи две, волшебни сни, подари ги…“ Јас ја поделив среќата со Тина и таа навистина стана двојна. Со задоволство Ви ја претставувам мојата авторска песна „Божиќен ден“. Музиката е стара оригинална идеја, која му ја свирев и пеев на син ми кога беше бебе. Во моментот кога бев скоро на пат сам да ја довршам новата божиќна песна, сосем случајно ја открив Тина Русева, Македонка од Струмица, која живее во Германија во моја близина. Таа е огромен млад вокален талент и професионалец, која внесе волшебство во оваа песна. Мојата цел е да оставам препознатливост и музика која ќе трае. Посакувам што поголемо слушање и ширење позитивна и божиќна енергија“, вели Александар.