Васил Гарванлиев во четврток, во Струмица ќе го промовира својот нов албум

Во четврток, 14 септември од 20:00 часот во Центарот за култура „Антон Панов“ во Струмица, струмичанецот Васил Гарванлиев ќе одржи концерт – промоција на својот најнов албум насловен „Васил“.

Албумот/концертот „Васил“ е мост на три музички жанрови, балканска, класична и поп музика, и вклучува нови композиции на македонски и англиски јазик.

„Овој музички проект го работевме повеќе од една година и секако главна инспирација беше македонската музика и моето искуство од класичниот свет. Токму затоа ова музичко патување го започнувам од „дома“, а наскоро се планирани промоции во неколку светски метрополи“, вели Гарванлиев.

Музичкиот тим кој има посебен придонес за ова музичко патување се реномирани македонски уметници и долгогодишни соработници на Васил Гарванлиев. Давор Јордановски – музички директор/клавијатури, Горан Алиќ – гитара, Ѓеорѓи Трајков – гитара, Сања Шуплевска и гудачкиот оркестар од „Полифонија“, Ратко Даутовски – перкусии, Оливер Јосифовски – бас, Александар Јовевски – кавал и тамбура, женскиот хор „Св. Злата Мегленска“, Сања Шутевска – кореограф, Ангела Богатинова – балерина, Јована Зајкова – современ танц, Барбара Поповиќ и Мила Николова – вокали.

Влезот на концертот е бесплатен.

Четврток, 14 септември | 20:00 часот | Центар за култура – Струмица