Василево ќе има фекална канализација – почна да се гради крак од 753 метри

Денеска во населеното место Василево почна реализацијата на проектот за изградба на фекална канализација во должина од 753 метри, а ја гради фирмата „Портланд“ од Струмица за сума од 3.257.961 денар. Во меѓувреме распишан е и нов тендер за дополнителни 542 метри фекална канализација.

„Ова е историски момент за Василево бидејќи ова е проект долгоочекуван и неопходен за секојдневното живеење на граѓаните од населеното место Василево. Со овој проект настапив и на Локалните избори 2021 година како ветување и врз основа на тоа ја добив довербата од граѓаните да ја водам општина Василево. Задоволството е огромно што денес сум токму овде на самото место каде што се реализира ова мое ветување. Задоволството е обострано, и кај мене како градоначалник, но и кај граѓаните на населеното место Василево, бидејќи јас го исполнувам моето ветување, а граѓаните на општина Василево и на населеното место Василево добиваат подобри услови за секојдневно функционирање. Повеќе нема да има излевање на септичките јами, а со тоа ќе се заштити животната средина“ – кажа градоначалникот Славе Андонов, потенцирајќи дека до крајот на неговиот мандат планира да изгради повеќе од 60% од фекалната канализација.

Андонов најави дека во наредните денови општина Василево ќе аплицира со проекти за изградба на канализација и во селата Ангелци и Пиперево.