Бурно беше на јавната расправа за предлог Законот за родова еднаквост. Мал простор, а полна куќа народ од различни профили, од невладини организации, советници, од општината, засегнати граѓани, имаше и неми набљудувачи од партиите, тука беше и градоначалникот Костадин Костадинов, викарниот епископ Јаков.
Министерката за труд и социјална политика, Јована Тренчевска ги сослуша сите присутни кои се јавија за збор, им одговараше на прашањата, но често им укажуваше дека тоа го нема во законот, дека е во друг закон, но не и во новата верзија на Законот за родова еднаквост. Повеќето реагираа дека новата верзија на законот е ставена на увид во последен момент, иако министерката тврдеше дека новата верзија до општината Струмица е пратена пред 20-тина дена.
Реагираше и Владиката Јаков, вели дека од синоќа е поставена новата верзија на веб сајтот на Министерството за труд и социјална политика.
„Со една верзија, со нова верзија, трета верзија, поставување пред полноќ на сајтот, еден ден пред дебата, на општините во југоисточен плански регион им се доставува изменета верзија. Луѓето се збунети, дозволивте да се создаде конфузност на еден куп верзии од законот, а може да биде едноставно, можеше да се прави апгрејд на ЕНЕР, да ја гледа целата јавност, да се организираа дебати, тоа е поентата за нешто што се подготвува да се донесе“ – кажа Владиката Јаков.
На дебатата се обрати и градоначалникот на Струмица, Костадинов кој истакна дека како градоначалник нема ингеренции во носењето на закони, но како прв човек на општината нема да дозволи да се навредуваат чувствата на сограѓаните без разлика на нивната конфесионалност.
„Но кога некој од било која институција, невладина организација, ќе се обиде да ми го ограничи моето фундементално право на движење и слобода на движење, тогаш ме загрозува“ – кажа Костадинов.
Кој е жена, а кој маж? Ја прашуваа министерката Јована Тренчевска, но и многумина сами се прашуваа. Во дилема се. Може ли роден машко, да се декларира како жена? Кој колку повеќе права ќе има. Скоро пет часа убедувања, прашања, одговори, недоречености.
Целта на јавните расправи е да се слушне мислењето на граѓаните и со тоа да се придонесе кон креирање на текст на законот кој ќе одговара на сите во државата. Она што немаше време да биде дискутирано на јавната расправа министерката Тренчевска побара да биде доставено во писмена форма до Министерството за труд и социјална политика и посочи дека сите предлози за измени ќе бидат разгледани и оние кои се конструктивни ќе бидат земени во предвид.
