Археологот Зоран Рујак ја постави изложбата „Материјалната култура на праисториските заедници во Струмичко-радовишкиот регион“

Од денеска во изложбениот салон на НУ Завод за заштита на спомениците на културата и Музеј во Струмица поставена е археолошка изложба на археологот Зоран Рујак, вработен во ова установа – „Материјалната култура на праисториските заедници во Струмичко-радовишкиот регион“.

Откриените артефакти, кои им припаѓале на праисториските заедници, кои живееле на територијата на Струмичко-радовишкиот регион, на светлината на денот ги изнесoa сите тајни на една материјална, но и духовна култура од пред повеќе милениуми. Според археологот Зоран Рујак, долгогодишните археолошки истражувања во овој регион, кои започнале во втората половина на 80-тите години од минатиот век, меѓу другото дадоа почетна основа за разбирање на процесите на создавањето на праисторски заедници кои се развивале од раниот неолит до полното железно време во една затворена микро целина.

„Преку повеќе локалитети се илустрира животот во праисторијата. Имено, тука се, пред сè, локалитетите Орниче, Костурино и Канли Чаир, Дамјан. И на двата локалитета се истражувани населби кои припаѓаат на раниот неолит, потоа овде ќе ги споменеме локалитетите Ангелци, Бојковци, Тополничка Река и Голема трпеза од периодот на доцниот неолит. Посебно е интересен повеќеслојниот локалитет Цареви Кули – Струмица, каде што беше истражувана населба од раниот халколит. На истиот локалитет е истражувана и населба од раното и средното бронзено време, а се појавуваат и траги од раното железно време. Бронзеното време беше опсервирано и на локалитетот Тополничка Река каде што населбата била поврзана со тајните на металуршките процеси. Раното железно време беше документирано на локалитетот Тополничка Река, додека полното железно време досега не е истражувано во споменатиот регион. Единствените наоди се пронајдени случајно, со градежни активности, од коритото на Штучка Река. Постојат повеќе локалитети кои досега не се истражувани. Само оваа година беа детектирани уште неколку нови во Струмичко-радовишкиот басен“, кажа Рујак на отворањето на изложбата.

Овој проект НУ „Завод и Музеј“ Струмица го реализираше заедно со НУ „Завод и Музеј“ Штип и Археолошки музеј во Скопје. Покрај авторот на изложбата, м-р Зоран Рујак во реализацијата на овој проект учествуваа и други археолози кои долги години го истражуваат светот на праисторијата, како што се: м-р Елена Стојанова-Канзурова, д-р Митко Штерјов, д-р Трајче Нацев, Игор Толевски и Оливер Бојаџиев.