![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Студентката на медицина на Универзитетот „Гоце Делчев“ во Штип, струмичанката Рената Атанасова синоќа во Центарот за култура „Антон Панов“ во Струмица го промовираше својот втор роман насловен „Апартман 313“.
„Апартман 313 е криминалистички роман со повеќе навидум неповрзани дејства кои со текот на приказната се сплотуваат во една целина. Станува збор за дело чиј процес на обработка траел неколку години, зашто потребите налагале обемни истражувања. Со оглед на тоа дека главна дестинација во самиот роман е Психијатриска клиника, авторката била во посета на неколку Психијатриски установи во Македонија на консултации, сè со цел појасно да ги визуелизира и ликовите, но и нивните карактери и растројства.
Уредничката на оваа издание, Гонца Запрова Анастасова од ЛУ Библиотека „Благој Јанков Мучето“, која установа се јавува како издавач на романот, вели дека „Апартман 313“ е резултат на повеќегодишното размислување, пишување и истражување на авторката Рената Атанасова која го обложува не само својот талент, туку и искрената посветеност во оваа работа, јасно отсликувајќи ги границите на нејзината имагинација.
„Рената создава свет полн со неверојатни пресврти, сложени ликови и теми, кои до последната страница будно ќе ви го задржат вниманието“ – кажа Запрова Анастасова.
Ана Глигорова Милева, рецензент на „Апартман 313“ вели дека во романот љубовта е дадена како болка. Посакување, страст, која на момент личи на онаа вистинската и долго очекувана љубов, а во следниот да се вкрстат тие чуства како огледало кое ни дава лажна и искривена слика.
„Рената нашиот главен лик бара нешто подлабоко, бара заштита во љубовта, бара партнер, другар со кој ќе изградат свој сопствен омеген простор каде можат да избегат од суровата реалност“ – кажа Глигорова Милева потенцирајќи дека „Апартман 313“ е неверојатна приказна која ќе ве остави будни цела ноќ.
„Апартман 313“ е соба, онаа место во мојата душа, во вашата душа, верувам и во сечија душа, онаа место кога ќе се затвориме, кога на видело ќе излезат, кога ќе дојде се пред нас, сите тие нешта, сите тие ситуации, кога не сме биле фер, пред се кон самите себе, кон оние коишто ги сакаме. Кога на едно место ќе се соберат сите тие обвинувања, сите тие непријатни чуства коишто ги имаме во себе, кога ќе седнеме и кога реално, искрено ќе поразговараме самите со себе и ќе бидеме реални кон сите наши грешки, кон сите наши недостатоци. Тоа е всушност „Апартман 313“, тоа е местото коешто е излив на сите тие непријатни емоции, тоа е местото, како што знам да кажам јас, во најтемните одаи од нашата душа“ – кажа на промоцијата авторката Рената Атанасова.
Издавањето на романот „Апартман 313“ од Рената Атанасова финсиски е поддржано од Фондацијата „ЗАЕВ – Едно општество за сите“, Општина Струмица и Општина Босилово.
