![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
„Да се засведочи, да се запише сето она што го оставил народот, тоа значи да се издигне паметник на местото коешто всушност ни ја дава смислата на нашето постоење, а тоа е родното место на секој од нас. Иван Котев има свест за значењето на родното место, на неговото родно место, меѓутоа тој има и воопшто свест за тоа дека да се развие или да се поттикне во човекот сознанието за националната припадност кон народот, кон земјата, единствениот начин тоа да се направи е да му се даде на показ вредното богатство што предците ни го оставиле, а тоа е фолклорот“, кажа професорката Ана Витанова Рингачева промовирајќи ја петнаесеттата книга на македонскиот фолклорист, струмичанецот Иван Котев, насловена „Наведе́ се с’нце да зајде“.
Најновото издание на Иван Котев е посветено на неговото родно место, струмичкото село Робово, во коe се поместени песни, приказни, поговорки, кажувања, информации за празници, обичаи и друго, кои оваа книга ја прават значајно дело за културно-историското наследство на Робово.
Ана Витанова Рингачева вели дека сериозниот пристап поткрепен со научна акрибија, го прави Котев човек кој, не само што запишува и дешифрира материјали од терен, туку и истражувач кој го проучува фолклорот и изложува свои тези поврзани со него.
„Нашиот Иван не само што го чувал од заборав фолклорот, тој го чувал од заборав и народниот јазик оној стар говор кој повеќе можеби и не постои, го конзервира на некој начин. Тој е оној убав селски говор на којшто неговата мајка му ги пеела најубавите песни“, додаде Витанова Рингачева.
Во присуство на голем број љубители на делата на Иван Котев, почитувачи, пријатели, на промоцијата во Центарот за култура „Антон Панов“ во Струмица говореа и Ермис Лафазановски и Зоранчо Малинов од Институтот за фолклор „Марко Цепенков“ во Скопје.
На самата промоција Иван Котев подари примероци од книгата „Наведе́ се с’нце да зајде“ на членови на семејствата, наследниците на неговите информатори кои му ги пренесуваа приказните од Робово, а Котев ги запишал во самата книга.
На промоцијата на книгата од Иван Котев беше промовирано и списанието „Македонски фолклор“ број 80 и 81 на Институтот за фолклор во кои се отпечатени трудовите презентирани на Научниот собир „70 години Институт за фолклор и 50 години фолклористичка дејност на Иван Котев“.
