„На загадувачите од Г1 тешка и загадувачка индустрија не им е местото во оваа рајска долина! Алуминиумот не е за пиење!”. Под овој слоган Невладината организација „Еко Долина“ денеска пред зградата на Општина Ново Село организираше протест за стопирање на изградбата, како што велат тие, на тешка загадувачка индустрија Г1, односно „Топилница за алуминиум“, која се гради на 80 метри од единствениот ископ за снабдување со вода за Ново Село. Освен тоа, тие реагираат и за неправилно издадена градежна дозвола за таа топилница, на земјиште со намена Г2 лесна незагадувачка индустрија, а објектот е во категоријата Г1, во подножјето на селото Смолари, зелениот бисер на Беласица, велат организаторите.
Тие бараат да се објават сите документи, особено технолошките, да се поништи градежната дозвола, да ѝ се одземат ингеренциите на Општина Ново Село за издавање градежни дозволи, да влезе државна ревизија и да ги прочешла целата општина и нејзиното работење и градоначалникот да поднесе итна и неотповиклива оставка. Велат дека се добредојдени сите, од сите политички партии, но без никакви политички симболи, знамиња, ознаки.
Организаторите добија поддршка од повеќе еколошки организации, од „Стига е“, а поддршка добија и од партијата Левица, од пратениците Сашко Јанчев и Реџеп Исмаил, кои присуствуваа на протестот заедно со активисти од локалните ограноци од овој регион.
„Отворањето на топилницата се спроведува на разбојнички начин! Се кријат документи, на објектот на градилиштето, спротивно на закон, не постои табла на која треба да стои кој е инвеститор, кој е изведувач и број на одобрение за градење, додека, пак, фирмите кои работат, од своите возила ги имаат извадено налепниците, за да не се знае кој ја прави изведбата“, велат од Левица.
Градоначалникот на општина Ново Село, Ѓорги Божинов вчера на социјалните мрежи објави видео обраќање во кое вели дека општината постапува согласно законите и дека одобренијата се издадени од Министерството за животна средина и просторно планирање, од каде тврделе дека не станува збор за загадувачка индустрија.
Од „Еко Долина“ велат дека протестот денеска заврши, но борбата продолжува. „Со нашите активности нема да престанеме се додека не биде одземена градежната дозвола за топилницата и не си поднесе неотповиклива оставка недостојниот градоначалник“, додаваат од „Еко Долина“.
