Алпинистичкиот клуб „Скала“ постави вештачка карпа во спортската сала на училиштето „Видое Подгорец“

Вештачка карпа од два дела високи 6 и 9 метри на кои има поставено десеттина насоки за искачување е поставена во спортската сала на ООУ „Видое Подгорец“ во Струмица на иницијатива и во организација на Алпинистичкиот клуб „Скала“.

Целта на овој проект, кој е со поддршка на Општина Струмица е да се афирмира и развива алпинизмот и спортското качување, но и дополнително поттикнување и кревање на спортскиот дух кај младите во нашата општина.

„Давајќи го својот влог во здравиот живот на младите, упатувам апел што помалку време да поминуваат со телефоните и пред компјутерите, а повеќе да ги има на спортските терени коишто ги имаме доволно во нашата општина. Да бидеме физички активни и да го развиваме масовниот и индивидуалниот спорт. Така си помагаме себе си и на заедницата во којашто живееме“, напиша на Фејсбук градоначалникот на струмица, Костадин Костадинов по посетата на вештачката карпа, на првиот отворен ден организиран денеска во салата на училиштето.

Секој граѓанин кој сака може да ја користи вештачката карпа за искачување и усовршување на техники, во планираните отворени денови кои ќе се организираат во наредниот период, а тренажниот процес ќе ја следат членови на АК „Скала“, кои ќе ги учат заинтересираните граѓани за техниките на спортското искачување и алпинизмот.