Од Алпинистичкиот клуб СКАЛА Струмица информираат дека го откажуваат планираното искачување на Сечена Скала на планината Беласица, кој како настан требаше да се одржи на 24 и 25 јуни.
„Еден од основните предуслови за безбедно движење во планина е внимателното следење на временската прогноза! За жал за овој викенд и местото на нашиот настан, подножјето на врвот Сечена Скала, таа временска прогноза не е добра. Најавени се грмотевични бури и дождови за двата дена. Земајќи ја во предвид структурата на теренот и експонираноста на местото, престојот на поголема група на луѓе на ваков терен со ваква прогноза е крајно небезбедно, најповеќе заради опасноста од удари од громови. Заради ова со жалење ви соопштуваме дека нашиот настан е откажан за овој викенд на Беласица“, стои во известувањето на Алпинистичкиот клуб СКАЛА, најавувајќи дека овој настан ќе се одржи во некоја наредна прилика за кој дополнително ќе информираат,
Од клубот со совет до оние кои сепак планираат да направат искачување на некој од врвовите на Беласица во саботата или неделата, е да ги почитуваат правилата на движење при појава на грмотевици, а имено да избегнуваат движење во поголеми групи, да избегнуваат движење по гребени и под осамени дрвја, на отворени пространства, врвови.
„Доколку ве зафати невреме за време на искажувањето, а носите метални предмети, да ги оставите подалеку од себе додека не помине опасноста. Помеѓу вашето тело и земјата под вас поставете некаков изолатор, подметка или суви чевли, побарајте некакво засолниште од дождот“, се вели во соопштението на Аплинистичкиот клуб СКАЛА.
