Една од најголемите фабрики за производство на мебел во Македонија, струмичката компанија „Алмак“, која постои веќе 31 година, синоќа во ресторанот „Шалом“ организираше прослава по повод јубилејот 10 години од отворањето на најголемиот салон за мебел во Македонија, Home by Almak во Индустриската зона кај Василево со површина од 5500 м².
„Home by Almak е салон број 1 во Македонија, а www.almak.mk е најголемата интернет продавница во Македонија, а можеби и на балканот. Home by Almak е тим кој победува, отвора нови врати и поставува нови стандарди во светот на мебелот. Секогаш е чекор напред пред другите, напред пред сите модерни трендови и технологии. Наша цел е да бидеме синоним за мебел во Македонија, а можеби наскоро и во некоја друга држава“ – кажа Никола Андонов, извршен директор на „Алмак“.
По повод јубилејот 10 години од отворањето на салонот за мебел Home by Almak, Андонов на вработени уште од отворањето на салонот, за нивниот 10-годишен јубилеј им додели признание, а на голем број вработените во четирите салони им додели подароци за создавањето на успешната приказна на „HOME by Almak“, заблагодарувајќи им се за целиот досегашен придонес и ангажирање со надеж дека уште многу години заедно ќе ги слават успесите. Признание за успешна соработка им беа доделени и на голем број компании со кои „Алмак“ има долгогодишна соработка.
Говорејќи за почетокот на „Алмак“, младиот Никола Андонов кажа дека оваа компанија за мебел е создадена во 1992 година во дворот на семејната куќа од страна на неговиот дедо, Никола Андонов.
„Во време кога во Македонија мебел произведуваа само големи мултинационални компании, „Алмак“ храбро ја започна својата приказна со капацитет од само една гарнитура неделно, а денес и до 50 гарнитури дневно. Од една мала работилница до производствен погон од 15.000 м² и четири салони за мебел во Индустриска зона Василево, кај Струмица, во Скопје, Велес и Кавадарци. Од само еден вработен, денес до 300 вработени. Почнавме од Струмица, своите производи се продаваа и низ цела Македонија, продолживме во Хрватска и Словенија, за да нашите производи почнаа да се продаваат и во Франција, Германија, Белгија, па дури и во Јужна Америка“ – кажа Андонов, говорејќи за брендот што го создаде неговиот дедо Никола, го надоградуваа неговиот татко Борче и чичко му Александар, а успешната приказна за „Алмак“ ја продолжуваат тој и неговите браќа Блаже и Стефан.
