Александар Димитров од Иловица повторно го освои златниот медал на натпреварот на „Елитни месари“ во Швајцарија

Александар Димитров од Иловица, струмичко повторно го освои златниот медал на натпреварот на „Елитни месари“ во Швајцарија.

На 20-то Швајцарско првенство за преработка на месо, што се одржа вчера во кантон Валис, тој во конкуренција со 40-тина месари од Швајцарија и повеќе европски држави го освои првото место на Akkordmitarbeiter „елитни месари“.

Станува збор за натпревар на кој месарите се натпреваруваат за брзо, прецизно и чисто дебонирање на три свински раменици. Инаку Александар веќе осум години живее и работи со семејството во Швајцарија, а пред заминувањето тој беше долги години дел од тимот на месара „Шунте“ во Струмица.

„Беше многу возбудливо, интересно но и малку напнато за да се бориш во таква елитна конкуренција. Им благодарам на сите за поддршката, чест и задоволство ми е што успеав да ја одбранам титулата од минатата година“, вели Александар.