Општина Струмица објави Јавен повик за субвенционирање на граѓани на општината за купување велосипеди во 2023 година. Целта на повикот е да се стимулираат жителите на градот Струмица и населените места за користење велосипеди. Од таа причина сите граѓани на општината кои од денеска, 21 март, па во наредните денови ќе купат нов велосипед може да добијат субвенции во износ од 50% од вредноста на купениот велосипед, но не повеќе од 10.000 денари по лице со вклучен персонален данок на доход.
Јавниот повик ќе трае до 28 април 2023 година, а субвенциите ќе се делат по принципот прв дојден прв услужен се додека не се искористат планираните средства за таа намена за што општината контуинирано ќе информира.
Општина Струмица во изминатите три години делеше субвенции за купување на нов велосипед, до сума од 4.000 денари, годинава таа е зголемена до 10.000 денари.
На јавниот повик не може да се јават лица кои имаат искористено, односно добиено парични средства за купување велосипед во 2020, 2021 и 2022 година. Право немаат ниту вработените во Општина Струмица со потесното семејство и општинските јавни претпријатија, „Комуналец“, „Струмица Гас“, „Паркиралишта Струмица“ и „Стационар Лана“.
