Ќе се гради уште еден парк од 13.000 м² кај Детската градинка „Виножито“

Ќе се гради уште еден парк кај новата Детска градинка „Виножито“ во Струмица на просторот од некогашната касарна со површина од 13.000 м². Овој проект доби најмногу гласови на синоќешната втора Форумска сесија од проектот „Справување со загадувањето на воздухот“ што Општина Струмица и Програмата за развој на Обединетите Нации (УНДП) го спроведуваат. Ќе се потрошат околу 340.000 долари, а Општина Струмица ќе кофинансира половина од средствата за оваа намена. Новиот парк ќе се реализира во следната 2025 година.

„Согласно изгласувањето на оваа приоритетна мерка ќе се урбанизира нов парк со површина од 13.000 м², истиот ќе биде опфатен со урбана опрема, со паметни клупи, паметно осветлување, со лед светилки, инфраструктура за отпад, приклучоци за полнење на мобилни телефони, и сето тоа ќе придонесува за доброто на граѓаните, бидејќи сите ние знаеме дека сакаме здрава и чиста средина којашто ќе ја оставиме за подобро здравје на нашите генерации“ – кажа заменичката на градоначалникот, Елена Маѓеровска Паликарова по завршувањето на форумската сесија.

Покрај зазеленување, односно изградба на парк до оној кој од неодмана се гради од 28.000 м², на синоќешната форумска сесија беа предложени уште три мерки за справување со загадувањето на воздухот во Струмица. Да се постават на три објекти енергетска фасада и топлинска излолација на кровот, третата мерка беше поставување фотонапоска централа за производство на електрична енергија од сонце за електричните автобуси кои се користат како јавен превоз и четвртата мерка беше за поставување на брзи полначи за електрични автомобили.

„Дел од мерките се мерливи, дел се значително мерливи и знаеме што придонесуваат. Како што видовме и од денешниот форум граѓаните најповеќе се заинтересирани за зелените површини, бидејќи тоа за нив е видливо, и од друга страна има дополнителен ефект, се обезбедува дека ќе остане зелена површина во иднина. Мерките допринесуваат за намалувањето на аерозагадувањето, маѓутоа најзначајно е дека граѓаните ја чуствуваат мерката како нивна и затоа они се одлучуваат за таа мерка“ – кажа Филип Стојановски од Центарот за климатски промени.

Проектот „Справување со загадувањето на воздухот“ е финансиран од владата на Шведска, а го имплементира УНДП во партнерство со Министерството за животна средина и просторно планирање и Општина Струмица.