Општина Ново Село ќе го возобновува фестивалот на млади таленти „Смотра – Златен глас“, кој се одржувал во селото Сушица и бил организиран за промоција на млади пејачи и автори неколку децении, се до 2013 година. Жителите на Сушица и од струмичкиот регион го паментат овој настан по интересни настапи и квалитетни музички изведби на млади таленти, меѓу нив првите чекори на естрадата токму на овој фестивал ги прави и веќе познатата македонска фолк ѕвезда Сузана Гавазова, родум токму од Сушица.
Годинава за учество на фестивалот, кој ќе се одржи во понеделник, 5 мај со почеток во 19:00 часот се пријавени 15 интерпретатори на возраст од 17 до 30 години од Ново Село, Струмица, Скопје, Гостивар, Прилеп и Радовиш.
За најдобрите учесници – интерпретатори ќе одлучува жири комисијата во состав: Спасен Силјановски, Андријана Јаневска и Александра Јанева, односно тие ќе ја доделата првата награда во висина од 50.000 денари, на второпласираниот 30.000 денари и оној кој од жирито ќе ја освои третата награда ќе добие сума од 15.000 денари.
Водител на фестивалот ќе биде Трајче Георгиев, додека сите учесници ќе ги придружува познатиот струмички бенд „Легато“.
Од Општина Ново Село поканата до сите граѓани од регионот на дружба пред бината на фестивалот во предвечерието на Ѓурѓовден.
