Денеска напладне и во Струмица како и во многу градови и села низ Македонија се одржа традиционалното празнување на празникот Богојавление – Водици. Во базенот „Аквариус“, откако беше осветена водата од страна на свештеници на Струмичката Епархија при Македонска Православна црква – Охридска Архиепископија беше фрлен Светиот крст, а среќата прв да го најде во водата меѓу дваесеттината струмичани ја имаше 30-годишниот Љубе Шопов од Струмица.
На среќниот наоѓач, Марјан Даскаловски, претседател на Советот во име на Општина Струмица му подари Крст од XII век „Реликвијар“, односно копија од крстот пронајден во ископините на Цареви кули кој упатува на Свети Ѓорѓија. Љубе исто така доби подароци од повеќе спонзори на ова манифестација.
Порака за благосостојба до верниците упатија свештениците од Струмичката Епархија со традиционалното христијанско честитање на празникот „Бог се јави“.
Со свечена Богојавленска литургија празникот Водици денеска беше одбележан во сите Православни храмови во Струмичката Епархија.
