![almak](https://strumicanet.com/wp-content/uploads/2025/07/1080x206-srnet-optimized.png")
Народот сака чист воздух и одговорност од политичарите, но и тие „протестираат“…
И по долги години дишење на загаден воздух и само „бла, бла“ низ социјалните мрежи, голем број струмичани конечно излегоа на протест низ струмичките улици. На политичарите и функционерите што ги водат институциите им кажаа дека не сакаат повеќе да дишат енормно загаден воздух во Струмица, особено во зимските месеци.
Ако политичките партии до пред некоја години на предизборните кампањи велеа „се случи народ“, демек едните ќе ги сменат другите со присуството на многу народ на митигот, и во последните изборни циклуси си ги преместуваат митинзите на потесни места, наместо на плоштад, сега ним им „се случи народ“, но овој пат неполитизирани и со единствена цел, да се сотрат загадувачите на воздухот во Струмица.
Дојдоа и тие на митингот, и СДСМ и ВМРО-ДПМНЕ и ЗНАМ и градоначалникот на Струмица, Костадин Костадинов. Чудна работа, но и трагикомична. Обично на протест се искажува незадоволство кон власта за непревземање мерки за одреден проблем, односно не решавање на проблемот, но тоа е Македонија.
Против кого протестираа и СДСМ и ВМРО-ДПМНЕ и ЗНАМ, кога тие се власт, едните локална, другите државна и тие може да донесат решение за долгогодишниот проблем во Струмица. Добро е што организаторите не им дадоа да се обратат, ама нели им тече партиска крв низ вени, не бива да не кажат нешто, па на социјалните мрежи се нападнаа. СДСМ дека ВМРО-ДПМНЕ е државна власт и таа е винова за загадувањето во Струмица „оваа зима“, а пак ВМРО-ДПМНЕ оти СДСМ е 20 години на власт во Струмица и таа е виновна за долгогодишното енормно загадување на воздухот.
Еко активистот Ѓорги Танушев во своето обраќање на митингот кога посочи две компании како едни од можните загадувачи на воздухот во Струмица, „Еленица“ и „Неметали Огражден“ и народот извикуваше „уааа“, партиските активисти и политичари реагираа согласно боите и блискоста на компаниите и даваа поддршка на кажаното од говорниците. „Сдсмовци“ аплудираа (читај незадоволство) на кажаното од Танушев кога се спомна „Огражден“, а „вмровци“ кога се спомна името „Еленица“. За џабе не е кажано од народот уште пред многу години „политиката е ку_ _ a“, ама нашите политичари сега станаа „чингии“…
Но, да се вратиме на темата за протестот, односно протестниот марш „Забрането дишење“ што го организираа еко активисти предводени од Еколошкото друштво „Здрава котлина“. Факт е дека секојдневно во Струмица воздухот е неподнослив, смрди, енормно е загаден кој достигнуваше и над 500 микрограми на ПМ10 честички на метар кубен. Секојдневно струмичани на социјалните мрежи само си објавуваа постови за загадениот воздух со сликички колку е загаден и залудно со години си коментираа, дебатираа. Конкретни инспекциски казни јавно не видовме, ниту слушнавме. Загадувачи немаме, а имаме загаден воздух, според институциите. Затоа народот „се дигна“ или како што си викаа на времето политичките партии „се случи народ“ и повеќе нема отстапувања од непревземањето мерки кон сите оние кои го загадуваат воздухот.
Еко активистите во името на граѓаните на протестот истакнаа конкретни барања до институциите со итни и краткорочни мерки, меѓу кои се и привремена забрана за работа на индустриските погони со висок степен на загадување, додека не се инсталираат филтри и не се потврди усогласеност со еколошките прописи, контрола на согорување на опасни и несоодветни материјали во пластениците и индустриските објекти со 24-часовни патроли, користење на рачни мерачи и дронови, итно затворање на дивите депонии кои испуштаат токсични гасови, нивна санација и физичко обезбедување на локациите со камери и бариери, зачестена контрола на нелегална сечна на огревно дрво, забрана за дотур и пуштање во промет на огревно дрво што не е отстоено во склад 8 месеци од денот на сечата.
Кажаа и загрижувачки здравствени податоци за тоа што се случува со струмичани од загадениот воздух, истакнувајќи и уште многу други барања. Но, каков ќе биде граѓанскиот отпор во наредниот период, ќе зависи од сите нас, дали сакаме чист воздух во Струмица, дали властите и нивните институции професионално ќе настапуваат или ќе ги спречи моќта на парите на сметка на здравјето на граѓаните.
Роберт Ѓоргиев
