Црвен крст: Хуманитарната помош да биде во финансиски средства, не во материјални добра, бидејќи царинските ограничувања не овозможуваат дотур

По катастрофалниот земјотрес кој ја погоди Република Турција и Сириската Арапска Република на 6 февруари 2023 година, Црвениот крст на Македонија веднаш ги контактираше Турската Црвена полумесечина и Сириската Арапска Црвена полумесечина со цел да се детектираат можности за обезбедување на поддршка за овие две партнерски организации на македонскиот Црвен крст со кои соработуваат долги години.

Од Црвениот крст информираат дека во координација со одговорните чинители во Република Северна Македонија веднаш презеле иницијални чекори за обезбедување на хуманитарна поддршка за настраданото население од земјотресот преку објавување на апел за мобилизирање на финансиска поддршка за погоденото население.

„На наше големо задоволство може со сигурност да кажеме дека граѓаните на Република Северна Македонија и овој пат ја покажуваат својата солидарност на дело. Заклучно со 07.02.2023 година преку донаторските телефонските линии се собрани вкупно 3.363.800 денари, а во Фондот на солидарност на Црвен крст на РСМ се уплатени вкупно 6.467.192 денари. Вкупно собрани се 9.830.992 денари. Исто така Црвениот крст на РСМ од своите стокови резерви издвои 1.000 семејни пакети со храна, 1.500 хигиенски пакети и 4.000 ќебиња“, велат од Црвениот крст.

Црвениот крст на Република Северна Македонија продолжува и понатаму да ја следи ситуацијата во Турција и Сирија. Во соработка со партнерите во Меѓународното Движење на Црвен крст и Црвена полумесечина и одговорните институции во државата, Црвениот крст ќе продолжи да ги координира и мобилизира хуманитарните напори на граѓаните, компаниите и други институции со цел да се обезбеди солидарна поддршка за погоденото население од земјотресот во Турција и Сирија.

„Во координација со Амбасада на Република Турција во РСМ договорено е во наредниот период активностите да бидат насочени кон собирање хуманитарна помош во финансиски средства. Ги поддржуваме напорите и активностите кои се однесуваат на донирање на материјална помош од фирми и компании. Помалите донации и иницијативи на граѓаните добро е да се пренасочат во собирање финансиски средства, не во материјални добра, бидејќи царинските ограничувања не овозможуваат дотур на таква хуманитарна помош. Со цел да бидеме поефикасни и подиректни и побрзи во помошта преферираме сите активности заедно да ги координираме и да ги насочиме во правец на мотивирање на граѓаните и населението да донираат парични средства. Собраните пари по завршување на кампањата ќе бидат префрлени на Турската Црвена полумесечина и Сириската Арапска Црвена полумесечина кои знаат како на најдобар начин може да се покријат хуманитарните потреби на своите граѓаните“ – стои во соопштението на Црвениот крст.