На бугарските воени гробишта во струмичкото село Ново Село денеска беше одбележан 6 Мај – Ден на храброста и празник на Бугарската армија, официјален празник во Република Бугарија. На овие воени гробишта се погребани војници на Бугарската армија кои загинале во Балканските војни (1912–1913) и Првата светска војна (1915–1918).
Свеченоста започна со изведба на химните на Бугарија, Македонија и Европа од оркестарот на Националното музичко училиште „Љубомир Пипков“ – Софија и заупкојна молитва за загинатите војници. Присуствуваа свештеници на Македонската православна црква – Охридска архиепископија и на Бугарската православна црква, предводени од струмичкиот митрополит Наум и игуменот на Гигинскиот манастир (кај Перник), архимандрит Никанор.
На настанот присуствуваа и амбасадорот на Бугарија во Македонија Ангел Ангелов, генералниот конзул на Бугарија во Битола Николај Димитров, градоначалникот на Петрич Петар Брчков и неговиот заменик Борислав Коларов, воените аташеа на Италија, Хрватска, САД, Украина, претставници на бугарската Национална гардиска единица, како и ученици од основни, средни и професионални училишта од десетина места во Бугарија.
Главен организатор на годинашнава церемонија е претседателот на Фондацијата „Бугарска меморија“ Милан Врабевски, но тој и бугарскиот европратеник Андреј Ковачев не присуствуваа бидејќи им беше забранет влез на македонска територија.
Фотографиите се преземени од бугарската национална информативна агенција БТА.
