Театарот е најстарата форма на уметничко изразување, преку која човекот спознава, рационализира, комуницира, порачува, прифаќа, се социјализира и го јакне психолошкиот хабитус. Како синкретична уметност, која во себе ги вклучува и музиката, танцот, гестот, мимиката, говорот, звукот и визуелното обликување, театарот е повеќе од само обично место за забава и релаксација. Театарот претставува определен начин на живеење, размислување и опуштење.
Од тие причини, а со цел кај младите да се развие желбата за посета на театар, НУ Центар за култура „Антон Панов“ од Струмица, во соработка со трите средни општински училишта „Јане Сандански“, „Димитар Влахов“ и „Никола Карев“, почнувајќи од денеска, па во наредниот период организираат заедничко следење на претставата „Вујко Вања“ од Антон Павлович Чехов, во режија на Дејан Ангелов, а во изведба на актерите од струмичкиот Народен театар, и истата ќе биде дел од наставните активности на учениците за запознавање и на театарската уметност.
Парадоксалното и еретично откритие во оваа претстава е дека совеста со истата суровост суди и за нестореното, за неслученото, за докрај нереализираната индивидуалност.
Улогите во претставата ги толкуваат: Кољо Черкезов, Васка Ангелова, Анкица Бенинова, Оливера Аризанова-Мансбард, Васил Михаил, Стојкан Велков Трн, Коста Ангов и Тинка Ристеска. Сценографијата и плакатот се на Никола Пијанманов, музиката на Ставро Ангелаков, а костимите на Ванчо Василев.
Први во посета на театарот ќе бидат учениците од СОУ „Никола Карев“, поделени во неколку изведби на претставата „Вујко Вања“, со термини во зависност од нивните наставни активности.
