Синоќа во Струмица, во Амфитеатарот беше промовирана монографијата „Цареви Кули – Струмица (од Римското Царство до доцен среден век)“, книга втора, од археологот и долгогодишен истражувач на Цареви Кули, м-р Зоран Рујак.
За авторот на оваа монографија, Зоран Рујак, Царевите Кули не биле себични, туку дале многу материјал и тој ја имал таа среќа да го преточи во оваа капитално дело за Струмица, книга прва и втора, потенцирајќи дека „оваа авантура“ со овие две книги нема да заврши, туку се продолжува и понатаму со некои нови откритија, нови сознанија.
Промовирајќи ја монографијата, д-р Митко Панов од Институтот за национална историја се осврна на историјата на овој археолошки локалитет. Тој потенцираше дека Цареви Кули ја доживува судбината да стане градежен материјал со кој ќе се ѕидат приватните и државни објекти во градот Струмица.
„На тој начин Цареви Кули се вградуваат во домовите на струмичани, отстапувајќи го своето минато на новите времиња. Меѓутоа рушевините остануваат да сведочат за некогашното постоење и долго време чекале да бидат откриени“, додаде д-р Панов.
Цареви Кули се обележје на Струмица и овој локалитет е неодминлив дел од историјата на градот се до Втората светска војна, кога за последен пат Цареви Кули биле употребувани за нејзината примарна цел, а тоа е воено упориште, кое со милeниуми бдеело над судбината на градот Струмица.
Издавач на монографијата е НУ Завод и Музеј Струмица, а промоцијата се одржа во рамките на Манифестацијата „Струмица Опен фестивал 2023“.
