Храбрите момци се вратија од Турција, доцна синоќа ги пречека градоначалникот пред општинската зграда

Пожарникарите-спасители од Противпожарната единица на Струмица кои беа во спасувачка мисија во Адијаман, Турција доцна синоќа се вратија во Струмица. Пожарникарите пред зградата на Општина Струмица ги пречека градоначалникот Костадин Костадинов.

„Ужасна беше глетката во Адијаман, целиот регион разурнат, патиштата и улиците беа како брановидно пресечени, очајно, многу загинати, а уште повеќе повредени“ – вели Вернер Стоилов, лидер на својот тим составен со уште седум пожарникари-спасители од Струмица, кои беа во состав на Републичките сили за заштита и спасување при ДЗС.

Костадинов ги угости во градоначалничкиот кабинет, им врачи признанија, ги слушаше нивните сведоштва од местата на страшната трагедија, она што го доживееја овие храбри момци во разурнатиот град во кој ги пребаруваат огромните купишта од бетон и метал за да најдат некој жив.

„Вечерва после полноќ со огромно чувство на одговорност, но во исто време и неизмерна гордост ги пречекав струмичките пожарникари кои беа во спасувачка мисија во Турција. Во мое име и во име на граѓаните на Струмица Ви се поклонувам до земја за се што правите за нас“ – кажа градоначалникот Костадаинов.

Во знак на благодарност од граѓаните на Струмица, Вернер Стоилов, Димче Диков, Ѓорги Ментинов, Костадин Каракашев, Трајче Митев, Митко Апостолов, Илија Узунов и Борче Спасов за својата пожртвуваност ќе добијат парична награда од општината во износ од една просечна плата, а дополнително секој припадник на ТППЕ Струмица ќе биде ослободен од обврската за плаќање паркинг во текот на целиот негов работен век.