Синоќа во изложбениот салон на Завод и Музеј во Струмица на показ пред струмичани поставени се 40-тина хартиени графички икони од 18 и 19 век пронајдени во кровните конструкции на црквите „Св. Димитрија“ во Варош и „Св. Благовештение“ во Прилеп.
Хартиените графики од икони биле случано пронајдени во кровниот дел на црквите во 2003 година при реконструкција на кровот. По пронаоѓањето конзерваторот Горан Стојаноски при НУ Заводи и Музеј – Прилеп веднаш ја направил примарната конзервација, зашто графиките биле во многу лоша состојба, скриени во гредите на кровот.
Ретка можност да се видат книжни икони кои се работени во традиционален стил според примерот на византиската и поствизантиската иконографија. Забележителна е слободата во претставувањето на манастирските комплекси, при што авторот се потрудил автентично да ја претстави архитектурата, придружните објекти и пејсажот околу манастирските комплекси. Графиката се смета за најмлада ликовна дисциплина, но истовремено е и најпопуларна и најшироко распространета. Техниката е заснована на механичко умножување на цртеж што е издлабена во дрвена или метална плоча. Најголем број од овие книжни икони потекнуваат од Света Гора, но не се исклучува фактот дека помал број од нив се изработени во Венеција и Виена.
