![almak](https://strumicanet.com/wp-content/uploads/2024/12/srnet-banner-dec-2-optimized.jpg")
Синоќа Фондацијата „Елеуса“ од Струмица во хотелот „Сириус“ го одржа третиот промотивен и воедно хуманитарен настан на кој беше претставена досегашната работа на Фондацијата „Елеуса“, со цел да се поттикнат уште повеќе деловни субјекти, луѓе од бизнис секторот, општините и сите граѓани да се вклучат во нивната работа и да станат дел од оваа хумано семејство.
Преку видео содржини беа презентирани активностите на оваа хуманитарно здружение кое постои скоро две години. Повеќе од една година секојдневно ја реализираат акцијата „Топол оброк за сите“ и во овој период се поделени скоро 23.000 оброци за најсиромашните наши сограѓани, благодарение на многубројни компании кои секојдневно се вклучуваат во оваа акција. Освен со обезбедување оброци Фондацијата „Елеуса“ подготви и им достави на 750 семејства хуманитарни пакети со храна и средства за хигиена, а се вклучува и во донаторски акции за помош на болни лица, но и за донирање на одредени апарати во јавни здравствени установи. Неодамна тие обезбедија два монитори за интензивна нега на најмалите пациенти, односно за Детското одделение при ЈЗУ „Општа болница“ Струмица. Истовремено организираа и неколку едукативно-културни настани.
„Кога зборуваме за „Елеуса“ и за дејноста која таа ја врши, не зборуваме за хуманост, туку зборуваме за човечност, зборуваме за стремеж кон вечноста, зборуваме за остварување на љубовта и на смислата на нашето постоење, зборуваме за богопознание, зборуваме за човекољубие и за богољубие. Оти нема друг начин да се научиме да бидеме милостиви, да бидеме човекољубиви надвор од него. Како што велиме многупати на нашите служби во Црквата „зашто си милостив и човекољубив Бог и тебе слава ти вознесуваме на Отецот и синот и светиот дух, Амин“! Бог да Ве благослови сите“ – кажа во своето обраќање пред голем број поддржувачи на Фондацијата „Елеуса“, Викарниот епископ стобиски г. Јаков.
Настанот беше збогатен со мал концерт на Вокално инструменталниот состав „Стихири“, а свој настап по официјалниот дел имаше и познатиот струмички гитарист Горан Алиќ.
Од Фондацијата упатија голема благодарност до сите присутни, благодарност за донациите собрани оваа вечер кои ќе послужат за подготовка на хуманитарните пакети по повод претстојните Божиќни и Новогодишни празници.
