![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
На денешен ден е родена најголемата македонска фудбалска ѕвезда на денешницата, Горан Пандев, кој наполни 40 години. По повод неговиот јубилеен роденден, ФК „Брера“ од Струмица, поранешна ФК „Академија Пандев“ денеска на спортскиот центар „Пандев“ во Струмица организираше „Отворен фудбалски ден со Горан Пандев“, каде огромен број деца имаа можност да се дружат и фотографираат со Горан, но и да ги покажат своите фудбалски вештини преку игра.
Целта на настанот беше да ја доближат работата на клубот со тренажниот процес до сите дечиња и заинтересирни граѓани и од прва рака да се информираат како да станат дел од фудбалското семејство на „Брера“ Струмица.
Горан со најмалата ќеркичка Софија истрчаа покрај дечињата, а со тортата ги пречекаа сопругата Надица со синот Филипо и ќерката Ана. Имаше силен ветер, па не можеа да се запалат свеќите со бројката 40, да ги дувне Горан, како што е обичај на роденден. Но освен една торта со презимето на Горан и бројката на годините имаше уште неколку торти, за многуте деца кои беа таму, а беа навистина многу. И освен што можеа да се почестат со тортата тие добија и подароци од славеникот Горан Пандев.
Пандев вели дека му е голема чест што роденденот го слави во родната Струмица, помеѓу младите таленти и идни фудбалери.
„Голема чест е мојот роденден да го прославам со толку многу дечиња. Навистина големо изненадување за мене. Благодарност до сите во „Академија Пандев Брера“ и посакувам цврсто здравје на сите. Ова е нов проект кој се базира на младите таленти, се надевам дека сите ќе ги служи добро здравје и целиме кон освојување многу титули. Овој проект е новина во Македонија и се надевам дека уште повеќе дечиња ќе дојдат во нашата школа. За нив ќе има многу изненадувања, ќе работиме по нова програма, ќе имаме новитети во тренерскиот погон и ќе се трудиме да ги охрабриме младите да спортуваат, да имаат почит кон повозрасните и да ги изведеме на вистинскиот пат“, кажа Пандев.
На роденденската забава му дојде и градоначалникот на Струмица, Костадин Костадинов кој му го честиташе роденденот на Пандев. Тој и Општина Струмица во континуитет ја подржуваат „Академија Пандев“, а градоначалникот Костадинов најави дека поддршката продолжува и понатаму кон ребрендираниот клуб „Брера Струмица“, каде Горан Пандев е претседател на Одборот на директори.
Горан Пандев кариерата како фудбалер ја заврши минатата сезона и комплетно се посвети на подобрување на условите во својата фудбалска академија.
