Фирма од Струмица ќе биде казнета со 9.000 евра – согорувала отпад од целулоза спакуван во најлонски вреќи

Во изминативе денови на социјланите мрежи имаше голем број реакции од граѓани на Струмица за непријатен мирис и горење на отпад на отворени површини.

Општинскиот инспектор за животна средина излезе на терен и извршен е вонреден инспекциски надзор кај правен субјект, каде на лице место е затекнато согорување на отпад од целулоза спакуван во најлонски вреќи.

На правниот субјект од страна на инспекторката за животна средина ќе му биде издаден прекршочен платен налог во висина од 9.000 евра и прекршочен платен налог за одговорно лице во правниот субјект во висина од 500 евра.

„Инспекциските служби на Општина Струмица уште еднаш апелираат до сите правни субјекти како и физички лица да не согоруваат отпад, целта не е да се казнуваат истите, но очигледно апелите од наша страна не допираат до секого, па поради тоа за таквите затекнати прекршоци ќе следуваат и соодветни казни“, стои во објавата на Фејсбук страницата на градоначалникот Костадин Костадинов.

Општина Струмица ќе продолжи и понатаму вонредните инспекциски надзори да ги објавува јавно на официјалната страна на општината, како и тоа дека ќе продолжи соработката со ТППЕ Струмица и активирањето на дронот во текот на денските и ноќните часови.