11-годишниот Стефан Ончев од Струмица, ученик во основното музичко училиште „Боро Џони“, го освои високото прво место на натпревар во Аликанте, Шпанија. Тој беше најдобар во својата категорија на натпреварување меѓу учесници на возраст од 8 до 11 години.
„Сценски настап, израз, опуштеност, квалитет“, тоа беа коментарите за младиот струмичанец Стефан од еминентното жири составено од врвни професори од Италија, Холандија, Украина, Србија и Шпанија.
На натпреварот учествуваа повеќе од 120 млади пијанисти на возраст од 8 до 32 години, од Кина, Бугарија, Романија, Русија, Македонија,Франција, Англија, Украина, Јужна Кореја, Италија, Србија, Германија и други земји. Натпреварот беше поделен во четири категории: А категорија до 11 години, Б категорија од 12 до 14 години, Ц категорија од 15 до 17 години и Д категорија од 18 до 32 години.
Натпреварот во Аликанте се одржа по втор пат, и е организиран од Културното здружение „Арс Алта“, во соработка со конзерваториумот во Аликанте, под уметничко раководство на меѓународниот концертен уметник Иштван И. Секели. Неговата цел е да му оддаде почит на големиот меѓународно познат пијанист од Аликанте – Гонзало Соријано (Аликанте 1913 – Мадрид 1972).
