Од 1 јануари училиштето „Никола Карев“ од Струмица ја почнува трансформацијата во Државно средно училиште – Регионален центар за стручно образование и обука за југоисточниот регион „Никола Карев“ Струмица.
Денеска во хотелот „Сириус“ во Струмица пред голем број гости од образованието и бизнис секторот, од општините и од Делегацијата на Европската унија се одржа Регионална конференција на која беше претставено досегашното Средно општинско училиште „Никола Карев“ од Струмица како нов Регионален центар за стручно образование и обука за југоисточниот регион кое ќе биде под „државна капа“, а државата ја презема одговорноста за инвестирање во училиштето. Во рамките на проектот на Европската Унија „Зголемување на атрактивноста инклузивноста и релевантноста на стручното образование и обука и образованието за возрасни“, Регионалниот центар за СОО во Струмица ќе биде целосно реконструирано.
Људмир Ковачев, проект-менаџер за средно стручно училиште вели дека целта на овој преоект на Европската унија е да се зголеми атрактивноста на средните стручни училишта.
„Регионалните центри ќе имаат клучна улога, не само за средното стручно образование, туку за сите стручни училишта во регионот. Планирано е Регионалните центри да пружат поддршка на сите средни стручни училишта, како и обуки и тренинзи. Регионалните центри треба да имаат блиска соработката со локалната заедница и локалниот бизнис сектор, како и со локалните власти и подрачните единици на министерствата“, кажа Ковачев.
„Освен оваа лидерска улога која ќе ја има овој центар во обезбедување на висококвалитетни вешти и доживотно учење во рамките на стручното образование и обука, наша цел е Регионалните центри за средно стручно образование и обука да промовираат иновации и истражувања. Еден од нашите врвни приоритети е инвестирање во човечки капитал како услов за економски раст и конкурентност. Токму средното стручно образование и обука се клучни за подигање на високот ниво на знаења, вештини и компетенции на средношколците насочени кон брзо вработување или успешно продолжување на образованието“, кажа Билјана Казанциска, државен секретар на Министерство за обвразование и наука.
На конференцијата се обрати и градоначалникот на Струмица, Костадин Костадинов говорејќи за досегашната соработка помеѓу Општина Струмица и СОУ „Никола Карев“ која резултираше со проектите „Шкафче за секој ученик“ и „Униформа за секое прваче“, изразувајќи надеж дека и покрај трансформацијата, таквата соработка ќе продолжи и во наредниот период.
Селекцијата на училиштата со капацитет за Регионални центри за стручно образование ја прават претставници на Европска Унија во соработка со Министерството за образование и наука.
Во Македонија има осум плански региони и според Националната стратегија на Министерството за образование и наука, во секој регион треба да има еден ваков регионален центар за стручно образование и обука.
